អាហារល្អ ៗ សម្រាប់អ្នកជំងឺទឹកនោមផ្អែម
ជំងឺទឹកនោមផ្អែមជាជំងឺរ៉ាំរ៉ៃមួយប្រភេទដែលរបបអាហារដើរតួនាទីយ៉ាងសំខាន់ ។ ជាការពិតណាស់ការកំណត់និងត្រួតពិនិត្យរបបអាហារសម្រាប់អ្នកជំងឺទឹកនោមផ្អែម អាចជួយជំរុញរាងកាយបង្កើនអាំងស៊ុយលីន និង ជួយគ្រប់គ្រងជំងឺនេះ ។ អាហារដ៏ល្អបំផុតសម្រាប់អ្នកជំងឺទឹកនោមផ្អែមមិនមែនសុទ្ធតែជាអាហារថ្លៃ ៗ និងនាំចូលពីបរទេសនោះទេ ។ អាហារសម្រាប់អ្នកជំងឺទឹកនោមផ្អែមគួរជាអាហារដែលមានកាកសរសៃខ្ពស់(Fiber) សារធាតុប្រឆាំងអុកស៊ីតកម្ម (Antioxidants) វីតាមីន សារធាតុរ៉ែ ប្រូតេអ៊ីន ព្រមទាំងបន្លែ និង ផ្លែឈើស្រស់។
វេជ្ជបណ្ឌិត សាន់ជេយ៍ ខាល់រ៉ា អ្នកពិគ្រោះជំងឺមហារីក នៃមន្ទីរពេទ្យផាទី ក្នុងទីក្រុង Karnal រដ្ឋ Haryana ប្រទេសឥណ្ឌា បានមានប្រសាសន៍ថា របបអាហារដែលផ្ទុកកាបូអ៊ីដ្រាត (Carbohydrates) និងកាឡូរីទាបព្រមទាំងសម្បូរសារធាតុបម្រុងរាងកាយខ្ពស់ និង ជាតិខ្លាញ់ទាបមានគុណប្រយោជន៍ណាស់សម្រាប់អ្នកជំងឺទឹកនោមផ្អែម ។ ផ្ទុយទៅវិញការធ្វើការរិតត្បិតទម្លាប់នៃញ៉ាំអាហារគឺពុំមានន័យថាអ្នករស់នៅក្នុងភាពខ្វះខាតនោះទេ។ ការគ្រប់គ្រងជំងឺទឺកនោមផ្អែម ជាការគិតអំពីរបបអាហារដែលអ្នកត្រូវទទួលទាន បរិមាណអាហារ និង ពេលវេលាសម្រាប់ការទទួលទានអាហារនោះ។ ខាងក្រោមនេះ ជាអាហារ ១១ ប្រភេទដែលអាចជួយអ្នកប្រយុទ្ធប្រឆាំងជាមួយនឹងជំងឺទឹកនោមផ្អែមយ៉ាងមានប្រសិទ្ធភាព ។
មើមឆៃថាវក្រហម (Beetroot)
ឆៃថាវប៊ីតរូត មិនគ្រាន់តែមានរសជាតិឆ្ងាញ់ប៉ុណ្ណោះទេ វាថែមទាំងមានសារធាតុកាបូអ៊ីដ្រាត(Carbohydrate) ទាបថែមទៀតផង ។ ឆៃថាវប្រភេទនេះ ជាប្រភពសម្បូរដោយវីតាមីន សារធាតុរ៉ែ កាកសរសៃ(Fiber) និងសមាសធាតុបំប៉ន (Phytonutrients) ដែលអាចជួយគ្រប់គ្រងជំងឺទឹកនោមផ្អែមបាន ។ នៅពេលជាតិស្ករធម្មជាតិនៅក្នុងឆៃថាវប៊ីតរូតត្រូវបានប្រើប្រាស់វាមិនបានត្រូវបម្លែងទៅជា គ្លុយកូសលឿនពេកទេ ដែលជាគុណប្រយោជន៍ដ៏ល្អសម្រាប់អ្នកជំងឺទឹកនោមផ្អែម ។ឆៃថាវប៊ីតរូតថែមទាំងមានផ្ទុកសារធាតុប្រឆាំងនឹងអុកស៊ីតកម្មមួយប្រភេទដែលហៅថា អាស៊ីតលីប៉ូអិច (Lipoicacid) ដែលអាចការពារកោសិការបស់មនុស្សពីការបង្កគ្រោះថ្នាក់នៅពេលមនុស្សមានអាយុកាន់តែច្រើន ។
ប៉េងប៉ោះ
ប៉េងប៉ោះសម្បូរទៅដោយសារធាតុលីកូពីន (Lycopene) ដែលល្អសម្រាប់បេះដូង។វាអាចកាត់បន្ថយអត្រាសម្ពាធឈាមខ្ពស់ និងគ្រោះថ្នាក់លើបេះដូងរបស់អ្នកជំងឺទឹកនោមផ្អែមបាន ។ ប៉េងប៉ោះមានផ្ទុកវីតាមីន C វីតាមីន A និងប៉ូតាស្យូម។ ប៉េងប៉ោះថែមទាំងផ្ទុកសារធាតុកាបូន និងកាឡូរីទាប ដែលធ្វើឱ្យវាជាអាហារដ៏ល្អបំផុតមួយសម្រាប់អ្នកជំងឺទឹកនោមផ្អែម។
គ្រាប់ល្ពៅ
ទទួលទានគ្រាប់ល្ពៅចំនួនមួយក្ដាប់ដៃអាចរារាំងមនុស្សពីការចង់ញ៉ាំអាហារដែលមានជាតិខ្លាញ់និងស្ករបាន ។ គ្រាប់ល្ពៅសម្បូរទៅដោយសារធាតុដែក និងប្រេងរុក្ខជាតិ
ហើយវាអាចជួយកាត់បន្ថយចំណង់អាហារថែមទៀតផង ។ គ្រាប់ល្ពៅត្រូវបានស្គាល់ជាអាហារសម្រន់មួយប្រភេទដែលជាអាហារសំខាន់មួយជួយត្រួតពិនិត្យរបបអាហារបាន ។
គ្រាប់ធញ្ញជាតិចម្រុះ (Mixed nuts)
គ្រាប់ធញ្ញជាតិសម្បូរទៅដោយអាស៊ីតខ្លាញ់ omega-3 និងមានកម្រិតសន្ទស្សន៍គ្លីសេមិក (glycemic index scores) ទាប ។ កម្រិតជាតិប្រេង និង សារធាតុបម្រុងរាងកាយរបស់គ្រាប់ធញ្ញជាតិជួយកាត់បន្ថយការរលាកដោយជំងឺទឹកនោមផ្អែម កាត់បន្ថយកម្រិតជាតិស្ករក្នុងឈាម និង កាត់បន្ថយកម្រិតកូឡេសស្តេរ៉ុល LDL (កូឡេសស្តេរ៉ុលអាក្រក់) ។ ការទទួលទានគ្រាប់ធញ្ញជាតិប្រមាណមួយក្ដាប់ដៃ ឬ៣០ ក្រាម ក្នុងមួយថ្ងៃមានសារប្រយោជន៍ណាស់ដល់សុខភាពទាំងមូល ។ គ្រាប់ធញ្ញជាតិជាអាហារជំនួសដ៏ល្អសម្រាប់អាហារដែលមានផ្ទុកសារធាតុកាបូន។
ម្រះ (Bitter gourd)
ម្រះផ្ទុកសារធាតុសកម្មមួយចំនួន ដែលអាចប្រឆាំងនឹងជំងឺទឹកនោមផ្អែម ដូចជាសារធាតុ Charantin ដែលមាននៅក្នុងម្រះ អាចកាត់បន្ថយគ្លុយកូសក្នុងឈាម និង សមាសភាពដូចជាអាំងស៊ុយលីនដែលមានឈ្មោះថា polypeptide-p ។ ទទួលទានទឹកម្រះស្រស់មុនពេលទទួលទានអាហារពេលព្រឹកមានគុណប្រយោជន៍ល្អបំផុតសម្រាប់សុខភាព ។ ជាពិសេស អាចទទួលទានទឹកម្រះជាមួយកន្ទួតដើម្បីទទួលបានវីតាមីន C សម្រាប់ជួយបង្កើនប្រព័ន្ធភាពស៊ាំឱ្យកាន់តែខ្លាំង។
ព្រីង
ព្រីងជាផ្លែឈើមួយប្រភេទដែលល្អបំផុតសម្រាប់អ្នកជំងឺទឹកនោមផ្អែម ។
ទទួលទានព្រីងអាចជួយបង្កើនសកម្មភាព និងចលនារបស់អាំងស៊ុយលីន ។ ក្នុងវេជ្ជសាស្ត្រឥណ្ឌាបូរាណព្រីងត្រូវបានប្រើប្រាស់ដើម្បីព្យាបាលវិបត្តិប្រព័ន្ធរំលាយអាហារហើយម្សៅគ្រាប់ព្រីងក៏ត្រូវបានប្រើប្រាស់ជាឱសថប្រចាំផ្ទះដើម្បីត្រួតពិនិត្យកម្រិតជាតិស្ករខ្ពស់ ក្នុងឈាម។ ព្រីងផ្ទុកសន្ទស្សន៍គ្លីសេមិច (Glycemic index) និងជួយបម្លែងអាមីដុង (Starch) ទៅជាថាមពលដើម្បីរក្សាកម្រិតជាតិស្ករក្នុងឈាម ។
ត្របែក
ត្របែកមានកម្រិតសន្ទស្សន៍គ្លីសេមិកទាប និងសម្បូរដោយ dietary fiber អាចជួយព្យាបាលការទល់លាមក ដែលអ្នកជំងឺទឹកនោមផ្អែមភាគច្រើនបានត្អូញត្អែរ ។ ការសិក្សាស្រាវជ្រាវមួយចំនួនបានរកឃើញថា ត្របែកអាចជួយកាត់បន្ថយការស្រូបជាតិស្ករចូលទៅក្នុងរាងកាយ ។ ត្របែកជាអាហារសម្រន់មួយប្រភេទយ៉ាងល្អបំផុត ។
រមៀត
រមៀតត្រូវបានចាត់ទុកជាអាហារសុខភាពដ៏ល្អមួយរបស់វេជ្ជសាស្ត្រឥណ្ឌាសម័យបូរាណសម្រាប់ជំងឺទឹកនោមផ្អែម ។ វាត្រូវបានប្រើជាឱសថបូរាណសម្រាប់ត្រួតពិនិត្យកម្រិតជាតិស្ករក្នុងឈាម ។ វាកំណត់មុខងាររបស់លំពែងនិងតុល្យភាពកម្រិតអាំងស៊ុយលីននៅក្នុងរាងកាយ។ ក្នុងសៀវភៅឱសថបូរាណប្រចាំផ្ទះនៃវេជ្ជសាស្ត្របូរាណឥណ្ឌា វេជ្ជបណ្ឌិត Vasant Lad បានណែនាំឱ្យអ្នកជំងឺទឹកនោមផ្អែម គួរអនុវត្តរបបអាហារដែលមានតុល្យភាពជាពិសេសចៀសវាងផលិតផលដែលលើសជាតិស្ករ កាបូអ៊ីដ្រាត និងទឹកដោះគោ។ អ្នកជំងឺទឹកនោមផ្អែមគួរទទួលទានបន្លែស្រស់ និងឱសថបូរាណដែលមានរសល្វីង។
Souce: Sokpheap
18/07/2017
អាហារល្អ ៗ សម្រាប់អ្នកជំងឺទឹកនោមផ្អែម
![អាហារល្អ ៗ សម្រាប់អ្នកជំងឺទឹកនោមផ្អែម]()
Reviewed by KH-Tour & Agriculture
on
July 18, 2017
Rating:
No comments: